總瀏覽量

2011年8月1日

十大炒家冷氣陳

大屋搬細屋,唔見一籮穀,攰到唔識郁,加拿大的網友Solarman兄贈言,老占,你再唔係十八廿二,小心身體,真係多謝曬各位留言。搬定之後,打字都手震,第一個收到的花牌,呀唔係,係花籃至啱,竟然係冷氣陳送過來,呵呵呵,敝欄自從Yahoo Blog雅虎搬過來之後,統計最多朋友睇嘅一篇博文,原來係《十大炒家街市周》,呵呵呵,既然叫得做十大炒家,梗係唔止周老板一個,冷氣陳都係,不過佢唔係炒香港樓,而係炒溫哥華樓,加拿大樓,佢老哥炒賣嘅豪宅不計其數,曾經個人擁有幾個商場,同周老板出身不同,周老板自少在雜貨舖長大,冷氣陳卻在出身大富之家,自少放洋,佢係老牌建築商太子爺,長子嫡孫,選特首董建華曾蔭權嘅選舉委員會,佢屋企有兩票,在楓葉國炒了N桶金之後,正式回流香港再玩過。


一日,佢無無聊聊行過上海街近砵蘭街一段,唔知係咪想去學民主派黨條傻佬咁搵141視察民生,見到一位阿伯喺度洗冷氣,部冷氣係一部窗口機,阿伯拿住支水槍係咁Fair Fair Fair,唔小心Fair到冷氣陳,真係未上鳳樓已經濕曬......個衭腳,於是乎冷氣陳就同佢阿伯搭訕:「阿伯,你幫人洗冷氣幾多錢一部呀?」阿伯話三幾百蚊啦,「吓!咁好搵?」

大家知唔知點樣洗冷氣嫁?首先,要搵師父將部機拆落嚟,放喺地下搵水狂Fair,然後又搵師父安番部機上窗口,咁樣一安一拆,費時失事,於是佢就不斷思考,如何改造這個行業?

後來,終於比佢想通咗,首創上門洗冷氣服務,如何洗呢?無論你一匹、兩匹、三匹機,一口價$190通殺,我問佢,咁你洗機啲污水如何處理?

佢話:「你洗過牙未?洗牙是一邊洗,一邊吸,有條強力氣喉把污水(牙血)吸走。」

洗冷氣都咁High Tech? 唔單止咁,佢仲請咗幾十個老Sale跑勻香港,此外,更主動出擊各大中小學專上學院,搵校長校董傾清洗校內冷氣,幾百間院校幾千台咁洗洗洗。有一次,冷氣陳著曬成套 Armani西裝,揸部 Benz跑揾校長傾生意,點知校長都係揸部萬事得,佢都唔好意思,要泊遠些少少,費事傷害校長弱小心靈。


這樣深耕網絡之後,洗冷氣年年為佢賺成千萬,但係瘦田耕開有人爭,後有追兵,上門洗冷氣啲價越來越Cheap,於是乎佢又諗多條橋,用咗幾皮嘢,研發一台專利機器,可以垂直升降又洗又吸,完全不經人手。傳統冷氣佬點會投資科研吖?又比佢贏了漂亮一仗,及後,佢嘅生意一路伸延至環保工程,在香港及神州遍地開花。

收到呢個花籃,想起這段舊事,都係時候約佢出來洗一洗白白,搵水Fair一Fair大佬細佬。

4 則留言:

  1. 真係錢好易賺,差在有冇腦;同肯唔肯....
    但看來我是冇腦

    回覆刪除
  2. 占SIR,有没将新屋的平面图俾你收归旗下的高人望一望啊? 讲到年纪大, 机器坏, 你仲KEEP得好FIT下. 小弟就腰围大过年纪, 点样减法, 过两招来好喔. 啊系喔...多谢你杯冻柠茶, 亦都多谢你老人家甘俾面见个闲人.我里世仔没试过饮野饮到个豪华臀吾想郁, 期待下一次的饮野....干杯!!

    回覆刪除
  3. 兄台言重了,我才是閒人呢

    回覆刪除
  4. 一定跟著 占 sir 多多學習, 務求脫笨

    謝謝!

    回覆刪除

注意:只有此網誌的成員可以留言。